وڭتۇستىك قازاقستان وبلىسىندا «رۋحاني جاڭعىرۋ» باعدارلاماسى اياسىندا ورداباسى تاۋىندا ءۇش بيگە مونۋمەنت ورناتىلىپ، «قازىعۇرت تاۋى» جوباسى جۇزەگە اسىرىلادى. بۇل ەكى تاۋدا تۋريستىك ينفراقۇرىلىمدار قاراستىرىلىپ، كيەلى، قاسيەتتى ورىنداردى اياقاستى ەتپەۋ جاقتارى مۇقيات ەسكەرىلگەن. ال وتىرار قالاشىعى مەن ارىستانباب كەسەنەسىن بايلانىستىراتىن ەجەلگى جول قايتا جاڭعىرتىلىپ، ونىڭ بويىنا ۇلتتىق قولونەرشىلەردىڭ شەبەرحانالارى بوي تۇزەيتىن بولادى. شىمكەنت قالاسىنداعى «تۇركىستان» سارايىندا وتكەن ەسەپتى كەزدەسۋىندە وبلىس اكىمى ج.تۇيمەبايەۆ وسىلاي دەدى.

سونداي-اق، ول قوجا احمەت ياساۋي مۇراسىنىڭ XVI-عاسىردا كوشىرىلگەن حيكمەتتەرىنىڭ 100-دەن استام قولجازبا نۇسقاسىن جاريالاۋ ارقىلى تۇركى دۇنيەسىنىڭ رۋحاني تۇتاستىعىن قامتاماسىز ەتۋ كوزدەلىپ وتىرعانىن اتاپ ءوتتى.

«بيىل وبلىستا رۋحاني جاڭعىرۋ تىڭ جوبالارمەن تولىقتىرىلىپ، وسى جىلى «قىمىزمۇرىندىق»، «قاۋىن fest»، «اگرو fest»، «اقسۋ-جاباعىلىنىڭ القىزىل قىزعالداعى»، «تۋعان جەرگە تاعزىم» اتتى وبلىستا ءداستۇرلى تۇردە وتەتىن ەرەكشە جوبالار باستاۋ الماق. ولاردىڭ قاتارى شاردارا اۋدانىنىڭ تۋريستىك الەۋەتىن كوتەرۋ ماقساتىنداعى تۋريستىك فورۋم «Safari Shardara» ءىس-شارالارى مەن سارىاعاشتا گولفتەن «Open Saryagash» جارىسىمەن تولىعاتىن بولادى»،-دەدى وبلىس اكىمى.

بۇدان بولەك، وبلىستا «تۋعان جەر» ارنايى جوباسى نەگىزىندە 50 جوبا دايىندالىپ، 153 ءىس-شارا جۇزەگە اسىرىلۋدا. ال «تاربيە جانە ءبىلىم» كىشى باعدارلاماسى اياسىندا 19 جوبا،  «رۋحاني قازىنا» اياسىندا 20 جوبا، «اتامەكەن» اياسىندا  10 جوبا، «اقپارات تولقىنى» اياسىندا 2 جوبا ىسكە اسادى.

ايتا كەتەيىك، اتالعان باعدارلاما شەڭبەرىندە «قاسيەتتى قازاقستان» ورتالىعىمەن جالپى رەسپۋبليكا بويىنشا 100 نىسان (قاسيەتتى، كيەلى جەرلەر) ىرىكتەلىپ الىنسا، ونىڭ ىشىندە وڭتۇستىك قازاقستان وبلىسىنان 25 نىسان ەنگىزىلگەن.  ال يۋنەسكو - نىڭ  «ۇلى جىبەك جولى ەسكەرتكىشتەرى» نوميناسياسى بويىنشا 8 ەسكەرتكىش ءبىزدىڭ وڭىرىمىزدە. ولار – ساۋران، تۇركىستان، سيداق، قاراسپان، جۋانتوبە، كۇلتوبە، وتىرار، ءبورجار ەسكەرتكىشتەرى. «كونە تۇركىستان» تۇجىرىمداماسى 3 كەزەڭگە قاراستىرىلعان.